Nolakoak diren aurreiritziak; guk uste baino indar gehiago izaten dute, eta zenbaitetan gure bizitzako ateak irekitzeko balio dute, beste askotan berriz ateak ixteko besterik ez dute balio. Guri dagokigu zer egin aukeratzea; lagun hurkoari, ez ezaguna den lagun-hurkoari nire bizitzan sartzeko aukera eman edo ez.

Natanaelek Felipen ahotsa entzuten du gaurkoan, eta Natanaelen erantzunak mugak jartzen ditu: “Nazaretetik atera ote daiteke ezer onik?” baina Felipen gonbidapenari baietz erantzuten dio: “Zatoz eta ikus” dio Felipe, eta hara doaz biak Jesusen aurrera.

Gure bizitzak gonbidapenez josiak daude, eta ondorioz esperientzia desberdinak izateko aukera izaten dugu; ondoren, ez dugu besteak esandakoa adierazten, baizik eta guk bizi izan duguna azaltzen dugu, indar berriz. Esperientziaren indarra beti izaten da berria, eta hor jabetzen gara besteak esandakoa beti motz geratzen dela; zein zaila den esperientzia bere osotasunean azaltzea.

Felipek bere esperientzia adierazi du eta, aurreiritziak eta guzti, Natanaelek esperientzia bizitzea aukeratu du. Bere egin du besteak kontatu diona; zer nolako poza Jesusekin aurkitzeak. Entzule zena lekuko bihurtu zaigu.

Entzule asko ezagutzen ditut, Jainkoaren esperientzia egin nahi ez dutenak; agian ausardia falta zaie, edo errazagoa gertatzen zaie aurreiritziak direla eta, gonbidapenari uko egitea.

Guri ere erraza egiten zaigu horrelakoetan bestea epaitzea; baina Jainkoak ez gaitu deitzen lagun hurkoa epaitzeko, ez da hori egiten duen gonbidapena.

Testigu izatera deitzen gaitu.

Ausartzen zara? Jainkoak zu ere gonbidatu zaitu, gonbidatzen zaitu… etengabe…

Muñoa