Jesusen arrastoei zehatzago edota hurbilago jarrai nahi dutenei, beti, pauso bat gehiago, haratago eskatzen zaie. Jesusek ondo daki fintzeko beti aukera dagoela. Eta, hain zuzen, Jesusek, Aitaren izenean eta izanean, gaurkoan ere horixe adierazten digu eta gure eskuetan uzten: “Entzuna duzue… Nik, ordea, hau diotsuet…”. Ordura arte entzundakoa ona da, baina Jesusek hitz hobe bat, goi mailakoa eskaintzen digu, eta ekintza edo jarrera txikiena blaitu behar duena, gainera: kontzienteki bestea haserrearazten duena, besteari “zoroa” edota “sinesgabea” esaten diona… erruduna da. Eta, hori, opariekin ez da konpontzen; baizik eta, elkarren artean hitz eta bakeak eginez. Jarrerak eta ekintzak batera joan behar dute; eta gero eta gehiago elkartu behar dira, bestela etengabeko itxurakerian eror gintezke. Eta, hori, Jesusek gogor salatzen du. Orduan, lege-maisuak eta fariseuek izan ziren, besteei esan eta beraiek betetzen ez zutenak; gaurkoan, gu izan gintezke. Zintzotasunez bateratzen eta fintzen ari dira nire jarrerak eta hitzak, eta ekintzak?

Arantxa Jaka