HITZA
Bizitza Ebanjelioaren argitan: egunero tartea hartzeko gonbidapena
Abuztuak 30
Aldi hartan, Jesus bere ikasleei azaltzen hasi zitzaien beharrezko zela bera Jerusalemera igotzea, eta han asko sufritu beharra zuela apaizburuen eta lege-maisuen aldetik; hil egingo zutela eta hiru egunen buruan piztuko zela. Orduan, Pedro, Jesus aparte harturik, gogor egiten hasi zitzaion: «Inola ere ez, Jauna! Ez zaizu horrelakorik gertatuko!». Baina Jesusek, itzulirik, esan zion Pedrori: «Alde nire ondotik, Satanas! Oztopo zara niretzat, zure asmoak ez baitira Jainkoarenak, gizakiarenak baizik». Jesusek esan zien, gainera, ikasleei: «Nire ondoren etorri nahi duenak uko egin biezaio bere buruari, har beza bere gurutzea eta jarrai biezat. Izan ere, bere bizia gorde nahi duenak galdu egingo du; bere bizia nigatik galtzen duenak, ordea, eskuratu egingo du. Zertako du gizakiak mundu guztia irabaztea, bere bizia galtzen badu? Eta zer eman dezake gizakiak bizia berriro eskuratzeko? Izan ere, Gizonaren Semea bere Aitaren aintzaz beterik etorriko da aingeruekin eta orduan bakoitzari bere jokabidearen arabera ordainduko dio».
Mateo 16, 21-27.
Jesus argi hitz egiten hasten da bere nekaldiari eta heriotzari buruz, eta Pedrok ezin du hori onartu. Mesias indartsu eta garailea espero zuen, eta ez bazterkeria zein gurutzea ezagutuko zituen norbait. Baina Jesusek erakusten dio Jainkoaren bidea ez dela arrakasta erraza, maitasunari azken uneraino leial izatea baizik.
Guk ere askotan nahiago dugu gure erosotasuna gehiegi astinduko ez duen fedea. Zaila egiten zaigu ulertzea Jesusi jarraitzeak geure burua erdigunean jartzeari uztea, berekoikeria baztertzea eta maitatzea kostatzen denean ere leial irautea esan nahi duela. Gurutzea ez da sufrimendua bilatzea; maitasunari eustea da, maitatzeak sakrifizioa dakarrenean ere. Barkamen-keinu bakoitza, isilpeko zerbitzu oro eta egiaren zein zuzentasunaren aldeko erabaki bakoitza Jesusi jarraitzeko moduak dira.
Jesusek gogorarazten digu bere bizitza gorde nahi duenak galdu egingo duela; maitasunagatik ematen duenak, berriz, inork kendu ezin dion poza eta askatasuna aurkituko dituela.
Hausnar dezagun:
- Zer babesten ari naiz hainbeste, Jesusi askatasun handiagoz jarraitzea eragozten didana?
- Zein da gaur maitasunez hartu eta eramatera deitua naizen gurutzea?
* Ebanjelioaren testuak Loyola Komunikazio Taldearen baimenarekin.
0 Comments