HITZA
Bizitza Ebanjelioaren argitan: egunero tartea hartzeko gonbidapena
Abuztuak 29
Aldi hartan, Herodesek Joan harrapatu eta kartzelan lotua zuen, Herodias zela eta. Herodesen anaia Feliperen emaztea zen Herodias, baina Herodesek bere emaztetzat hartua zuen, eta Joanek esaten zion:
«Ez zaizu zilegi zeure anaiaren emaztea edukitzea». Horregatik, gorroto zuen Herodiasek Joan eta hil egin nahi zuen, baina ezin, Herodesek begirune baitzion Joani; gizon zuzen eta santutzat zeukan, eta babestu egiten zuen. Joanen hitzek kezkarik sortzen bazioten ere, gogoz entzuten zion. Etorri zitzaion, ordea, Herodiasi aukerako eguna: Herodesek, bere urtebetetzean, afaria eman zien agintari, gudalburu eta Galileako handikiei. Sartu zen jantokian Herodiasen alaba eta dantzan egin zuen, eta atsegin izan zitzaien Herodesi eta mahaikideei. Orduan, erregeak esan zion neskatxari: «Eskatu nahi duzuna, eta emango dizut». Eta zin eginez agindu zion: «Eskatu ahala guztia emango dizut, nire erreinuaren erdia bada ere». Atera zen neskatxa eta bere amari galdetu zion:«Zer eskatuko diot?». Amak erantzun:
«Joan Bataiatzailearen burua». Itzuli zen arin-arin erregeagana eta eskaria egin zion: «Emadazu oraintxe bertan Joan Bataiatzailearen burua azpilean». Goibel jarri zen erregea, baina mahaikideen aurrean egindako zinagatik, ez zion ukatu nahi izan. Berehala, bere guardiako bat bidali zuen, Joanen burua ekartzeko aginduz. Joan zen hura kartzelara eta lepoa moztu zion, eta azpilean ekarri zuen burua; neskatxari eman zion, eta neskatxak amari. Joanen ikasleak, hori jakitean, haren gorpua jasotzera etorri eta hilobian ehortzi zuten.
Markos 6, 17-29.
Joan Bataiatzailearen heriotzaren kontakizunak gogorarazten digu egia ez dela beti ongi hartzen. Badirudi Herodes Antipasek gustura entzuten zituela Joanen hitzak, eta bazekiela Joanek egia ziola, baina ez zen ausartu egia horri bere bizitza aldatzen uztera. Zuzen jokatu beharrean, besteen aurrean zuen irudia galtzeko beldurra nagusitu zitzaion. Guri ere antzeko zerbait gerta dakiguke: ona eta zuzena zer den jakin arren, erosotasunak, harrotasunak edo ingurukoen presioak beste bide batetik eraman gaitzakete.
Joanek ez zuen inor epaitu nahi izan; Jainkoaren egiari leial bizitzea baino ez zuen egin. Horregatik, haren bizitzak erakusten digu leialtasunak ez dituela beti txaloak ekartzen, baina bai barne-askatasuna, inork kendu ezin duen askatasuna. Ebanjelioak geure buruari galdetzera gonbidatzen gaitu: zerk gidatzen ditu gure erabakiak? Egiak ala besteen onespena lortzeko beharrak?
Hausnar dezagun:
- Zein beldurrek eragozten didate zuzena dela dakidana egitea?
- Zer urrats eman dezaket gaur Ebanjelioaren egiari leialago bizitzeko?
* Ebanjelioaren testuak Loyola Komunikazio Taldearen baimenarekin.
0 Comments