HITZA
Bizitza Ebanjelioaren argitan: egunero tartea hartzeko gonbidapena
Abuztuak 28
Aldi hartan, Jesusek parabola hau esan zien ikasleei: «Zeruetako erreinuarekin, beren kriseiluak eskuetan hartu eta senargaiari bidera irten zitzaizkion hamar neskatxekin bezala gertatzen da. Neskatxetako bost zentzugabeak ziren eta bost zentzudunak. Kriseiluak hartzean, zentzugabeek ez zuten oliorik hartu; zentzudunek, ordea, kriseiluekin batera olioa ere hartu zuten ontzietan. Senargaiak luzatzen zuenez, logaletu egin ziren denak eta loak hartu zituen. Gauerdian oihu bat entzun zen: “Badator senargaia; irten zakizkiote bidera!” Jaiki ziren neskatxa guztiak, eta beren kriseiluak prestatu zituzten. Orduan, zentzugabeek esan zieten zentzudunei: “Emaguzue olio-pixka bat, kriseiluak itzaltzen ari zaizkigu eta”. Zentzudunek erantzun zieten: “Ea ez dugun nahikoa geuretzat eta zuentzat; hobe duzue, badaezpada, dendara joan eta erosi”. Baina, erostera joanak zirelarik, senargaia iritsi zen, eta prest zirenak ezteietara sartu ziren harekin. Eta atea itxi zuten. Iritsi ziren, azkenik, beste neskatxak ere eta dei egin zuten: “Jauna, Jauna, ireki!” Baina hark erantzun zien: “Benetan diotsuet, ez dakit nor zareten”. Egon, beraz, erne, ez baitakizue, ez eguna, ez ordua».
Mateo 25, 1-13.
Neskato guztiak senargaiaren zain daude, eta denak lokartu egiten dira. Jesusek ez ditu pertsona perfektuak eta inperfektuak aurrez aurre jartzen; bihotza zaindu dutenak eta barruko sugarra zaintzeari utzi diotenak baizik. Olioa inork gure ordez bizi ezin dezakeen Jainkoarekiko harremana da: otoitzean hazten den konfiantza, eguneroko xehetasunetan erakusten den leialtasuna eta itxaronaldia luzatzen denean ere irauten duen maitasuna. Badira azken unean bereganatu edo besteengandik jaso ezin daitezkeen gauzak. Fedea egunero elikatzen da, ia ohartu gabe, bihotza zabaltzeko aukera xume bakoitzean. Gaur ere Jauna isilean hurbiltzen zaigu: topaketa batean, dei batean edo maitasunez jokatzeko nahiz berriro hasteko aukera batean. Esna bizitzea ez da beldurrez bizitzea, itxaropenaren argia pizturik eustea baizik, Jauna gure ondotik igarotzen denean hura antzemateko.
Hausnar dezagun:
- Zerk elikatzen du gaur zure lanparako olioa?
- Zer ari da, ia konturatu gabe, zure itxaropenaren argia itzaltzen?
* Ebanjelioaren testuak Loyola Komunikazio Taldearen baimenarekin.
Izugarri gustatu zaizkit aste guztian Pakeak egin dituen hausnarketak. Mila esker!!