HITZA
Bizitza Ebanjelioaren argitan: egunero tartea hartzeko gonbidapena
Abuztuak 26
Aldi hartan, honela mintzatu zen Jesus: «Ai zuek, lege-maisu eta fariseu itxurazaleok! Hilobi zurituen antzeko zarete: kanpotik itxura ederrekoak, baina barrutik hil-hezurrez eta ustelkeriaz beteak! Zuek ere honelakoak zarete: kanpotik zintzoak jendearen aurrean, baina barrutik itxurakeriaz eta gaiztakeriaz beteak. Ai zuek, lege-maisu eta fariseu itxurazaleok! Profeten hilobiak eraikitzen eta gizon zintzoen hilarriak apaintzen dituzue, esanez: “Gure arbasoen egunetan bizi izan bagina, ez genukeen parterik hartuko haiekin profeten hilketan”. Horrela, zeuek aitortzen duzue profetak hil zituztenen ondorengoak zaretela. Bete, bada, zeuek ere zuen gurasoen egintza gaiztoen neurria!».
Mateo 23, 27-32.
Jesusen hitzak gogorrak iruditu dakizkiguke, baina maitasunetik jaiotzen dira. Min ematen dio fedea itxura hutsean geratzen dela ikusteak. Kanpotik ederrak baina barrutik hutsik dauden hilobi zurituen irudia erabiltzen du, badakielako itxurari soilik eusten dion bizitzak bihotza nekatzen duela.
Guri ere gerta dakiguke dirudigunaz gehiago arduratzea benetan garenaz baino, edota besteek ikusten dutena zaintzea barruan ditugun zauriak, beldurrak edo kontraesanak ezkutatzen ditugun bitartean. Jesusek ez gaitu epaitzen, ezta umiliatzen ere. Egian bizitzera gonbidatzen gaitu, maskararik gabe; izan ere, Jainkoak ez baitu bizitza perfekturik eskatzen, prest dagoen bihotza baizik.
Gaur ere Jainkoak gure segurtasunak zalantzan jarri eta errukiz, zuzentasunez nahiz xumetasunez bizitzera deitzen gaituzten pertsonen bidez hitz egiten digu.
Hausnar dezagun:
- Bizitzako zein alorretan bizi naiz gehiago itxuratik egiatik baino?
- Prest al nago gaur Jainkoak aldatzera gonbidatzeko bidaltzen dizkidan ahotsak entzuteko?
* Ebanjelioaren testuak Loyola Komunikazio Taldearen baimenarekin.
0 Comments