HITZA
Bizitza Ebanjelioaren argitan: egunero tartea hartzeko gonbidapena
Abuztuak 25
Aldi hartan, honela mintzatu zen Jesus: «Ai zuek, lege-maisu eta fariseu itxurazaleok! Barazkirik kaxkarrenen hamarrenak ordaintzen dituzue; legeko gauzarik garrantzizkoenak, berriz, zuzenbidea, errukia eta leialtasuna, bazterrera uzten. Hauek bete behar zenituzten, haiek baztertu gabe. Gidari itsuok! Eltxoa iragazten duzue, eta gamelua irensten! Ai zuek, lege-maisu eta fariseu itxurazaleok! Edalontzia eta platera kanpotik garbitzen dituzue, barrutik lapurretaz eta gutiziaz beterik dauden bitartean. Fariseu itsu hori! Garbi ezazu lehenik edalontzia barrutik, kanpotik ere garbi geldi dadin».
Mateo 23, 23-26.
Jesusek ez ditu fariseuak erlijioso direlako kritikatzen, baizik eta kanpotik erakusten dutenaren eta barruan bizi dutenaren artean alde handiegia dagoelako. Arauak zorrotz betetzen dituzte, baina bizitzari benetan eusten dioten funtsezko gauzak ahaztu dituzte: zuzentasuna, errukia eta fideltasuna.
Gu ere tranpa berean eror gaitezke, itxurak zaintzea pertsonak zaintzea baino errazago egiten zaigunean, edota arau bat betetzea entzuteko, barkatzeko nahiz sufritzen ari denarengana hurbiltzeko prest egotea baino samurragoa denean.
Jesusek bihotzari begiratzen dio, badakielako bertan sortzen dela egiten dugun guztia. Ez ditu pertsona perfektuak bilatzen, bere maitasunari eraldatzen uzten dioten bihotz prestuak baizik. Barrena aldatzen denean, gure begirada, hitzak eta bizitzeko modua ere aldatzen dira, eta fedea berri on bihurtzen da besteentzat.
Hausnar dezagun:
- Zer ari naiz gehiago zaintzen: nire irudia ala nire bihotza?
- Zuzentasunezko, errukizko edo fideltasunezko zein keinu egitera gonbidatzen nau gaur Jesusek?
* Ebanjelioaren testuak Loyola Komunikazio Taldearen baimenarekin.
0 Comments