HITZA
Bizitza Ebanjelioaren argitan: egunero tartea hartzeko gonbidapena
Uztailak 25
Aldi hartan, zebedeotarren ama hurbildu zitzaion Jesusi bere semeekin eta aurrean ahuspeztu, eskari bat egiteko. Jesusek galdetu zion: «Zer nahi duzu?». Eta hark: «Agindu ezazu nire bi seme hauek, eser daitezela zure erreinuan bata zure eskuinean eta bestea zure ezkerrean». Eta Jesusek: «Ez dakizue zer eskatzen duzuen. Gauza al zarete Nik edan behar dudan kalizatik edateko?». Erantzun zioten: «Bai, gauza gara!». Jesusek orduan: «Nire kalizatik edan,bai, edango duzue; baina nire ezker-eskuin esertze hori, ez dago nire esku inori ematea; nire Aitak norentzat prestatua duen, hari emango zaio». Gainerako hamarrak, hori entzutean, biziki haserretu ziren bi anaiekin. Baina Jesusek dei egin eta esan zien: «Badakizue herrietako agintariek menpean hartzen dituztela herriak, eta handikiek beren agintea ezartzen dietela. Ez bedi izan horrela zuen artean; baizik eta zuen artean handi izan nahi duena izan bedi zuen zerbitzari, eta zuen artean lehenengo izan nahi duena izan bedi zuen morroi. Gizonaren Semea ere ezbaita etorri zerbitzatua izatera, zerbitzari izatera baizik, eta bere bizia askoren ordainsari ematera».
Mateo 20, 20-28.
Ebanjelio honetan, Zebedeoren semeen amak ohorea eta boterea eskatzen dizkie semeentzat. Jesusek, ordea, arrakastaren eta handitasunaren logika irauli egiten du. Haren Erreinuan handiena ez da agintzen duena, zerbitzatzen dakiena baizik. Gaur egun ere gizarteak ospea, eragina eta aitortza bilatzera bultzatzen gaitu. Sare sozialetan, lanean edo erakundeetan, askotan lehen postua lortzea da helburua. Jesusek, aldiz, beste bide bat erakusten digu: apaltasuna, doakotasuna eta besteen aldeko zerbitzua. Benetako lidergoa ez da nagusitzea, pertsonak hazten laguntzea baizik. Elizan ere tentazio bera izan dezakegu: karguak edo protagonismoa bilatzea. Kristoren ikaslea, ordea, bere burua opari bihurtzen duen pertsona da. Jesusek bere bizitza eman zuen guztion alde, eta horixe da kristauaren eredua. Zerbitzua ez da ahuleziaren seinale, maitasunaren indarraren adierazpen baizik. Egunero aukera ugari ditugu etxean, lanean eta elkartean besteen zerbitzari izateko. Hor hasten da Jainkoaren Erreinua eraikitzen: maitasunez eta umiltasunez bizi den bihotzean.
* Ebanjelioaren testuak Loyola Komunikazio Taldearen baimenarekin.
0 Comments