Gerasatarren lurraldea: Xavier León-Dufour-ek bere ‘Itun Berriaren Hiztegia’ obran dioskunez, dirudienez, Gerasa hau ez zen herri judua, Judeako lurretatik kanpo zegoen, Dekapolis-en hain zuzen, egungo ‘Jeras’-ekin identifikatzen delarik (Jordania), hortaz hiri helenistiko eta erromatarra izango zen nagusiki, politeista, judu gutxi batzuk bertan bizi bazitezkeen arren. Hortik seguruenik “beren lur-mugetatik alde egiteko eskatu zioten.”

Bat-batean zail egiten zaigu asmatzea, pentsatzea gure mundu-ikuskerarako bitxi samarra  den pasarte honen bidez zer izan daitekeen komunikatu nahi digutena.

Deabrudunak (edo demoniodunak, ‘daimon’etik eratorria eta zentzu negatiboa emana), nortzuk ziren? Zeri esaten zitzaion? Zer ulertu behar ote dugu ‘deabru’dun irakurtzen dugunean? 

Zenbait kulturatan nolabait identifikatu egiten ziren gizateriari gertatu ohi zaion gaitz ororen indar eragile ezkutuekin, eta sarri gainera joera izaten zen indar horiek ‘jainkozko’ egiteko. Itun Zaharrean ere halakoen oihartzunik badago, baina indar demoniako horiekiko Jainkoaren nagusitasuna azpimarratzen da. Gaurkoan irakur dezakegunez, Itun Berrian ere topatzen ditugu horren aztarnak: gaitzak izendatzeko moduetan, ‘demonioak harturik’, ‘gaixotasunaren eragileak’… Jesuk demonioak harturikoak sendatu egiten ditu, gizaki baitatik demonioak erauzi eta bota egiten ditu, gaitzak jotako gizakia osatu egiten du…, izan ere, gaixotasuna, idolatria, amarrua, engainua, gezurra,  hybris-a… herioa, demonioaren (diabolo-aren, berdina izan ez arren) zerbitzariei egozten zaizkie.

“ Jesusek erantzun: Zuek ere ez al duzue oraindik ulertzen? Ez al duzue ikusten ahotik sartzen den guztia sabelera joaten dela eta handik komun-zulora? Ahotik ateratzen dena, berriz, bihotz barrutik dator, eta horrek bai egiten duela gizakia zikin! Izan ere, bihotzetik ateratzen dira asmo txarrak, hilketak, adulterioak, lizunkeria, lapurretak, gezurrezko testigantzak, irainak. Horiek dira gizakia kutsatzen dutenak; …” (Mt 15, 16-20a)

Demoniorik ez dela, zeinek dio ezetz, ondoegi ezagutzen ditut/ditugu, modu intimoan ezagutu ere, barru-barrutik, eta kanpo-kanpotik ere, exit/o-an batez ere, ez al ditugu ikusten, sumatzen egunero harrokeriaz ni/gu/zu inguratuz?

Baina Jesuk garaitu ditu eta nagusitasun osoa du haien gainean, utikan!

Bejondagigula, eta garbi-bidean lagun diezagula !

Juankar Olaeta