HITZA
Bizitza Ebanjelioaren argitan: egunero tartea hartzeko gonbidapena
Maiatzak 31
Hain maite izan zuen Jainkoak mundua, bere Seme bakarra eman baitzion, harengan sinesten duen inor gal ez dadin, baizik eta betiko bizia izan dezan. Jainkoak ez baitzuen bere Semea mundura bidali, mundua kondenatzera, haren bitartez mundua salbatzera baizik. Harengan sinesten duena ez dago kondenatua; sinesten ez duena, berriz, kondenatua dago jadanik, Jainkoaren Seme bakarraren izenean sinetsi ez duelako.
Joan 3, 16-18.
Sarri askotan entzun izan dugu mehatxua: arau jakinak gordetzen ez baditugu, Jainkoak betiko kondenatuko gaitu (infernura joango gara eta han betiko kiskaltzen egongo gara). Mendeetan zehar beldur hori izan da Elizak erabili duen tresna nagusietako bat eta gure tradiziorik hurbilenean ere beldur horren sustraiak oso sakon sartuta daude.
Baina gaurko ebanjelioak kontrakoa diosku: Jainkoak maite gaitu eta maite gaituelako bere seme bakarra bidali du gure artera, ez kondenatzeko, bizia izan dezagun baizik. Jesusek irakatsi zigun heriotzaren ondoren ba dela bizirik, baina heriotzaren aurretik ere bizia izan dezakegula, Jainkoaren proposamena onartuta, hari jarraitzea erabakitzen badugu.
Eman ditzagun eskerrak, Jainkoak, bere proiektua gure eskuetan utzita, gugan jarri duen konfiantzagatik eta Jesus gu guztiengana eta gutako bakoitzagana bidaliz ireki dizkigun bideengatik.
* Ebanjelioaren testuak Loyola Komunikazio Taldearen baimenarekin.
0 Comments