Pedroren galdera guk ere egiten dugu sarri askotan. Gehienetan guk ez dugu guztia utzi Jesusengatik eta Berri Onagatik. Guztia asko da. Baina bide bat egin dugu: aukerak eginez joan gara, gauza batzuk utzi eta beste batzuk hautatu ditugu, gure denbora honetan eta hartan ematea erabaki dugu, gurekin zerikusi handirik ez zeukaten pertsonak senidetzat hartu ditugu… Eta orain zer? Zer abantaila dakar Jesusi jarraitzeak?

Bada, horrek guztiak ez digu abantailarik ekarri; edo horrela dirudi, behinik behin. Segurtasuna, ongizatea ematen ziguten zenbait gauza utzita, ez dugu jaso etorkizuneko promesa bat baino. Eta zaila egiten zaigu horretaz fidatzea, askoz fidagarriagoak iruditzen baitzaizkigu gure kontu korrontea, gure lana, gure ideologia etab.

Jesusek dioskunez, ordea, beste familia bat sortzen ari gara eta partekaturiko ondasunetan oinarritutako aberastasuna ere bai. Eta areago: horrela jokatuz betiko bizi betea ereiten ari garela diosku Jesusek, Jainkoak nahi duen mundua, alegia. Emaguzu, Jauna, zure promesaz fidatzeko fedea eta Jesusi jarraitzeko adorea.

Bittor Uraga