HITZA
Bizitza Ebanjelioaren argitan: egunero tartea hartzeko gonbidapena
Urtarrilak 13
Kafarnaumen, larunbatean sinagogan sarturik, irakasten hasi zen Jesus. Jende guztia txunditurik zegoen haren irakaspenaz, nagusitasunez irakasten baitzien, eta ez lege-maisuek bezala. Bazen, hain zuzen, sinagoga hartan espiritu gaiztoaren menpe zegoen gizon bat, eta oihuka esan zuen: «Zer duk gurekin, Jesus Nazaretarra? Gu hondatzera al hator? Bazekiat nor haizen: Jainkoaren Santua». Jesusek gogor eraso zion: «Isil hadi eta atera gizon horrengandik!». Espiritu gaiztoak astinaldi gogorra eman zion eta, garrasi handia eginez, atera egin zen gizonagandik. Denak ikaraturik gelditu ziren, elkarri galdezka: «Zer dugu hau? Irakaspen berria, eta nolako nagusitasunez emana gainera! Espiritu gaiztoei ere agintzen die, eta obeditu egiten diote!». Laster zabaldu zen Jesusen entzutea Galilea aldeko bazter guztietara.
Markos 1, 21b-28.
Ezina ekinaren ekinez egina. Gaizkiaren eta Gaiztoaren aurkako lehia bizian aurkitzen dugu Jesus hasiera hasieratik Markosen liburuan. Lehenengo larunbat hau egun programatikoa dugu, hau da, bere misio osoa zertan datzan garbi adierazten du: gizakia eta gizateria menpen hartua duen gaizkia errotik ateratzea, eta betirako hondatzea. Garbi uzten du Jesusen misioaren funtsa ebanjelioak deabruarekin oroitzen duen elkarrizketa laburra eta ikaragarria.
Ez da harritzekoa Jesusen nagusitzak esnatzen duen miresmena eta harridura: Jainkoaren Santutasunari dagokion lilura eta begirunea da. Izan ere, nagusitza ekintza bat burutzeko gaitasuna baita, inork ezer egin ez dezakela ekintza horren betetzea galarazteko. Jesusekin, beraz, ezina gizakia menpean hartu duenarena bilakatzen da.
Kristauok Jesusen nagusitzaren lekukoak gara. Elizan eta gure bizian egiaztatzen da eta gertaberritzen modu anitzetara. Sakramentuak ditugu, gaur egun ere, nagusitasunez ari denaren presentziaren giltzarria: bere presentzia nonahi sumatu eta gure testigantzarekin luzatzeko. Ezinaren etsipena gure bihotz berritzearen beharraren ezaugarria da; itxaropena aktibo gure sinesmenaren adierazgarri.
* Ebanjelioaren testuak Loyola Komunikazio Taldearen baimenarekin.
0 Comments