Gaurko Berrionaren pasarteak Jesusen misioaren muina argi erakusten du. Espirituaren indarrez jarduten du, eta Nazareten, bere herrian bertan, Jainkoaren egitasmoa hitzez jartzen du. Isaiasen testua irakurriz, ez du teoria bat azaldu, baizik eta bere bizitza osoaren norabidea adierazi: behartsuei Berri Ona, gatibuei askatasuna eta zapalduei duintasuna ekartzeko etorria da. Horixe bera esaldi batez laburbiltzen du: «Gaur bete da». Jainkoaren salbazioa ez da etorkizun urruneko promesa, orain eta hemen gertatzen den eginkizuna baizik. Jesusen mezua onartzen dutenek halaxe egiaztatzeko aukera dute. Jesusen aldarrikapenak, alabaina, sinagogako entzuleak harritu, eta haiengan galdera deserosoak sortzen ditu. Entzuleak Jesusen aldarrikapenaren aurrean duen bigarren aukera da. Onartu nahi dugunoi, ordea, Jesusek hitzez ez ezik, ekintzez ere erakutsiko digu Berrionean zer esan nahi duen Jainkoaren onginahiak. Bidean gabiltzanok bataioan hartu genuen Espiritu berak  gidatuko eta bultzatuko gaitu gure inguruan askatasunaren eta itxaropenaren lekuko izateko, eta Jesusen eginkizun askatzailearekin eta sendatzailearekin jarraitzeko.

Kristoren aurrean, berarekiko elkarrizketan: Identifikatzen al naiz Jesusen misioarekin? Zein neurritan? Bizi naizen inguruari begira zer eskatzen dit horrek?

Jon Ona