Doinua: Doinu zahar baten (Antton Valverde)

Jainko hurbila, Jainko apala,
gizatar Jainko laguna,
ikusezina gureganatuz
begi aurrean doguna,
ez zara arrotz, ez zagoz urrun,
estalpean zaituguna,
maitasun hutsa, umetxo legez,
egin zara ezaguna,
poz iturria, salbatzailea,
besoetan haur biguna.

Salbatzailea, seaska hortan
hartzen dogu besoetan,
Salbatzailea eskertzen dogu
pozarren gabon kantetan,
Salbatzaileak askatzen gaitu
negar, samin, malkoetan,
Salbatzaileak laguntzen gaitu
umetan eta gaztetan,
Salbatzailea, egin gagizuz
zure lekuko danetan.

Gure artean etxea jarriz
zu zaitugu misiolari,
gure herrian gu adoretuz
bidelagun ibiltari,
gure fedea indar barrituz
zalantzan dabilenari,
Jainko Seme lez guraso dozuz
Jose eta Andra Mari,
euren laguntzaz jaso zaitugu
Gabonetako opari.