HITZA
Bizitza Ebanjelioaren argitan: egunero tartea hartzeko gonbidapena
Uztailak 3
Tomas, hamabietako bat, Bikia zeritzana, ez zegoen haiekin Jesus etorri zenean. Gainerako ikasleek esan zioten:
«Jauna ikusi dugu». Tomasek erantzun zien: «Haren eskuetan iltze-zuloak ikusten ez baditut, neure atzamarra haren iltze-zuloetan eta neure eskua haren saihetsean sartzen ez baditut, ez dut sinetsiko». Handik zortzi egunera, etxean zeuden berriro ikasleak, eta Tomas ere haiekin zen. Sartu zen Jesus, ateak itxirik zeudela eta, erdian jarririk, esan zien: «Bakea zuei». Gero esan zion Tomasi: «Ekarri atzamarra, begira nire eskuak; ekarri eskua eta sartu nire saihetsean, eta ez izan sinesgogor, sinestedun baizik». Tomasek erantzun zion: «Ene Jauna eta ene Jainkoa!». Jesusek esan zion: «Ikusi nauzulako sinetsi al duzu? Zorionekoak ikusi gabe sinesten dutenak.
Joan 20, 24-29.
Jesusekin topo egiten dugunean, horrek bizitza aldatu ahal digu. Eta hori ez da norberaren esperientzia hutsa. Tomas ez zegoen gainerakoekin Jauna agertu zitzaienean, eta horregatik ez zuen sinesten. Komunitatea behar zuen, etxean ateak eta leihoak itxita ezkutatzen ziren lagun haien taldea, Jaunarekin topo egin ahal izateko. Eta guri ere gauza bera gertatzen zaigu: kritika zorrotzak egin ahal dizkiogu Elizari, baina Jesusekin suertatu garela konturatzeko, Eliza behar dugu, Eliza baita Jesusen aurpegia laino artean bezala ezagutu dugun ispilu hautsia.
Baina gauza batzuk lehen pertsonan egin behar dira. Jesus ezagutzeko, zauriak ukitu behar dizkiogu eta orduan aitortu ahalko dugu Jesus ikusi dugula. Taldea behar dugu. Areago: kristauen fedea taldekoa da, ezinezkoa da talderik gabe sinestea. Baina sineste hori, aldi berean, lehen pertsonakoa da, norberak egin beharreko esperientzia eta apustua.
Eskerrak, Jauna, momenturen batean gugana hurbildu zarelako. Lagun iezaguzu, gaurko zaurituak ikusten ditugunean, haiengan zu ezagutzen eta “Hemen zaude, Jauna, ene Jainkoa” esaten.
* Ebanjelioaren testuak Loyola Komunikazio Taldearen baimenarekin.
0 Comments