HITZA
Bizitza Ebanjelioaren argitan: egunero tartea hartzeko gonbidapena
Ekainak 21
Aldi hartan, Jesusek esan zien ikasleei: «Ezin izan da inor bi nagusiren morroi; izan ere, bata gorroto izango du eta bestea maiteko, edota bati leial izango zaio eta bestea ez du aintzat hartuko. Ezin zarete Jainkoaren eta diruaren morroi izan. Horregatik diotsuet: Ez kezkatu bizitzeko zer jango edota gorputza zerez jantziko. Ez ote da bizia janaria baino gehiago, eta gorputza jantzia baino gehiago? Begira zeruko hegaztiei: ez dute ereiten, ez uztarik biltzen, ez mandioan pilatzen; hala ere, zeruko zuen Aitak janaritzen ditu. Ez al duzue zuek haiek baino askoz gehiago balio? Asko kezkatuta ere, zuetako nork luza lezake apurtxo bat bizitza? Eta jantziaz, zergatik kezkatu? Begira nola hazten diren loreak zelaietan: ez dira lanean nekatzen, ez dute iruten; baina, egia esan,Salomon bera ere, bere ospe guztian, ez zen janzten horietako bat bezain apain. Beraz, gaur belardian dagoen eta bihar suan erreko den belarra Jainkoak horrela janzten badu, zenbatez gehiago zuek, sinesmen txikikook? Ez kezkatu, bada, zer jango, zer edango, zer jantziko duzuen pentsatuz. Jentilak arduratu ohi dira horiez guztiez. Zeruko zuen Aitak badaki horien guztien beharra duzuela. Bilatu lehenbizi Jainkoaren erreinua eta beronen zuzentasuna, eta gainerako guztia gehigarri emango dizue Jainkoak. Ez kezkatu, bada, biharko egunaz, biharko egunak ere ekarriko baitu bere kezka. Aski ditu egun bakoitzak bere buru hausteak».
Mateo 6, 24-34.
Gaurko Berrionaren irakurketan, Jesusek jaten dugun janariaz, arropaz edo gure gorputzaz gehiegi ez kezkatzeko esaten digu. Jakina garrantzitsuak direla, baina Jesusek eskatzen diguna gure kezken neurriaren zentzua izatea da. Garrantzitsuagoa denaz gehiago kezkatzeko eskatzen digu, eta garrantzi gutxiagokoa denaz gutxiago kezkatzeko. Garrantzi gutxiko gauzez arduratuegi egoteak gure burua eta bihotza gure bizitzetan benetan funtsezkoa den horretatik aldentzen ditu. Gure kezka eta gogo nagusia Jainkoaren nahia bilatu eta egitea da. Hor dago garrantzia. Jainkoaren erreinua zabaltzen jarraitzen laguntzeko. Jesus gure iturria da, Jainkoaren nahia nola egin behar dugun ikusteko argia.
Kezka gure bizitzaren parte da. Gauzez arduratzen gara. Gure seme-alabez, gure guraso gaixo edo adin handikoez, gure lanaz, gure finantzez, gure osasunaz, etab. arduratzen gara. Denok kezkak ditugu, baina erlatibizatzeko eskatzen digu Jesusek. Berak ere, bere gizatasunean, bere dizipuluez, bere misioaz, bere Nekaldiari aurre egiteaz eta abarrez ere kezkatu zen. Bere laguntza dugu.
* Ebanjelioaren testuak Loyola Komunikazio Taldearen baimenarekin.
0 Comments