Testu honetan ikaragarrizko tentsioa nabaritzen da.  “Ni pertsegitu banaute, zuek ere pertsegituko zaituztete”. Ez dirudi berri ona denik. Jesusi jarraitzeak dakarren bizipen desatseginaren eskarmentua izan zuen Joanen komunitateak.

“(…); nire hitza hartu badute, hartuko dute zuena ere”. Pertsegitua izan arren, Joanen komunitateak Jesusen hitza partekatzeari eta aldarrikatzeari eutsi zion, esperantza galdu gabe, Jesusengan errotua baitzen.

“Nire izenagatik egingo dizuete hori guztia, bidali nauena ezagutzen ez dutelako”. Bizipen mingotsa eta mingarria: kanpokoak ez ezik, barnekoak ere tirabiren eta pertsekuzioen iturri izan daitezke. Fedearen bidea ez da bide argia, diszernimenduak eskatzen baititu bereizteko benetako arrazoiak eta zioak. Itxura batera, Jesusen hitza erabil daiteke Jesus bidali duenaren logika okertuz, hots, Aitamaren bihotz errukitsua ulertu gabe.

Beharbada, oso garai aproposetan bizi gara Joanen komunitatearen lekukotasunaz gogoeta egiteko.

Eskatu diezaiogun Aitama errukitsuari haren Espiritua, bai haren logika barneratzeko, bai haren logikari eusteko, ondorioak ondorio.

Luzio Uriarte