Ausarta, benetan, gaurko Ebanjelio zatia. Gainera, Galileatik kanpo ematen dena. Beraz, Jesusentzat giro berri bat. Eta berria, benetan, Jesusen bidaietako atal hau hasten den moduan. Pentsa ezina! Hortxe, Jesusen aurrez-aurre: emakume bat, jentila, feniziarra; erantsi, alaba -beste emakume bat-, eta hura gaixorik -deabruz beterik-; amak ez du erraz amore ematen Jesusek esaten dionari… Are gehiago, Jesus ‘behartzen’ du pentsatzen ez zuen pauso bat ematera. Xumetasunezko erabateko jarrera: Jesusengana joan eta oinetan ahuspeztu. Alaba ezin zen mugitu -deabruak erabat lotuta zeukan- eta, horregatik, ama hurbildu zen. Jesus ukitzeko beste modu bat. Jesus ere heriotza sortzen duten usadioak ‘ukitzeko’ prest, horrek egiazko bizitza sortzen badu. Zorionekoa, zu, emakume hori, horrelako ausardia ematen dizun fede sakon eta xume horrengatik! Zorionekoa, zu, Jesus Jauna, Jainkoaren Erreinua eraikitzearren horrelako ausardiaz jokatzeagatik!