HITZA
Bizitza Ebanjelioaren argitan: egunero tartea hartzeko gonbidapena
Abenduak 13
Aldi hartan, Jesusek esan zion jendeari: «Zeinen antzekoa dela esango nuke gizaldi hau? Plazan eserita dauden haurren antzekoa da; honela oihu egiten baitiete batzuek besteei: “Soinua jo dizuegu, eta zuek dantzarik ez; hiletak jo, eta zuek aienerik ez”. Izan ere, etorri zen Joan Bataiatzailea, ez jan ez edan egiten ez zuela, eta deabruak harturik dagoela diote. Etorri da Gizonaren Semea, jaten eta edaten duela, eta honela diote: “A zer tripazaina eta mozkorra, zergalari eta bekatarien adiskidea”. Baina egiteek Jainkoaren jakinduriari eman diote arrazoia».
Mateo 11, 16-19.
Atzoko ebanjelioaren segida Mateorenean. Ustezko errealitatea, egin beharrekoa, ondo legokeena…, batzuetan geure irudira, beste batzuetan geure gogara eta bestetan gure mundutxoaren arrazoimen-markora moldatzeko joera izaten dugu, noiz zer komeni zaigun. Eta saiatzen gara gure burua horren inguruan konbentzitzen, limurtzen; kontua zera da, une bakoitzean dagokiona zer den sakonean askotan jakin arren, ez egiteko aitzakia bilatzea eta topatzea; nire erosokeriatik aterako nindukeen deiari leihoa ixtea, nire barne-kontzientziari muzin, nire ipuintxo justifikatzailea eraikiz eta irentsiz, nire erabakia eta jokabidea zurituz: artista naiz mila arrazoi txit arrazoizko topatzen, nire baitan itxita, kuzkur jarraitzeko, Jainkoaren jakinduriaz, naturaz, senideez axolagabeturik, harri bihurturik: hybris.
Ez Joan! nire erara moldatutako arrazoi hauengatik, ezta Jesu ere! nire erara moldatutako kontrakoengatik… Eta nire egiteek zer diote?
* Ebanjelioaren testuak Loyola Komunikazio Taldearen baimenarekin.
0 Comments