Oraingoan farisearrak dira Jesus eztabaidara eraman nahi dutenak. Beraien artean denak ez ziren joera berdinekoak. Batzuk era tranpatian luzatuko zioten galdera, eta beste batzuk modu onean Mesiasen etorrera desiratzen zutelako. Bazeuden Jesus errefusatzen zutenak, Kristo izatea ezinekotzat hartzen zutelako. Eta arrazoi nahasiekin “harrapatu” nahi dute, hitz-jarioan trabatuz.

Farisearrentzat akuilu sarkorra zen Jesusen jarduera aske eta askatzailea. Horregatik Mesiasen etorrera noiz eta nola gertatuko den galdetzen diote, beraientzat gertaera ikusgarri eta trinkoa izango zen, ageri-agerikoa eta ukaezina. Ez zuten garapen bidezko etorrerarik espero. Are gutxiago agerikotasunik gabekoa. Onartzen zuten, ordea, bat-batean etor zitekeela, aurretiko zantzurik gabe.

Jesusen erantzunean argi geratzen da Erreinua Historiaren barnean garatzen doala, pertsonengan eta gizartearen gorabehera eta kontraesanetan. Atzera-aurrera eta era dialektikoan? Horrek adi egotea eskatzen du: Jainkoagandik espero diren berriztatze eta hobekuntzak nola doazen mamitzen.

Guri kosta egiten zaigu egunerokoan Erreinua hazten eta sakontzen doala onartzea. Gainera “jadanik zuen artean dagoela”…

Patxi Otamendi