Gizakiok izaki jakin-goseak  gara.

Zer gordetzen du kutxa horrek? Zergatik erantzun dit modu horretan?

Jakin-minari esker, bila gabiltza bizitzan; nonbait, bizitzak harritzen gaituenez, erantzunen eske gabiltza etengabean. Nolabait, nor bere jakingurak bizi du.

Andres eta haren laguna jakin-min handikoak  dira. Haien jakin-nahiak Jesusengana eraman ditu: Jesus haien ondotik pasatzeak eta Joanen lekukotasunak ikusmina eta jakin-mina esnatu dizkie. Jesusengan badago zerbait harrigarria, zerbait berria, zerbait erakargarria… zer izango ote da?

Hori dela eta, Jesusen atzetik mugitzen hasi dira, Jesusen urratsei jarraitzen.

Hala ere, jakin-minak berez ez dakar jarraitzeko konpromisorik Jakin-mina ebanjelioetako pertsonaia askoren ezaugarria da, besteak beste, Zakeo, Herodes edo samariarrarena.

Ematen du Jesusek ez duela jakin-min hori elikatzen.

Berritasunean oinarritutako jakingura kea bezalakoa da, haizeen menpe, norabiderik gabe, berehalaxe desagertzen da (beharbada, beste jakingura batek ordezkatua). Modaren kontua.

Jakin-min oroz harago, “zeren bila zabiltzate?” galdetzen du Jesusek.

Jesusek, bila dabiltzanen jakin-gosea elikatu beharrean, bizipen pertsonala, sakona eta arriskutsua egitera gonbidatzen ditu gazte jakin-gose haiek: “zatozte eta ikusi”. Jakin-min oro, nola kea haize ufadetan, nola unez uneko moda, gurutzearen aurrean lurrundu egiten baitira.