HITZA
Bizitza Ebanjelioaren argitan: egunero tartea hartzeko gonbidapena
Azaroak 24
Aldi hartan, Jesus, tenpluan sarturik, bertan salerosketan ari zirenak kanpora botatzen hasi zen, esanez: «Liburu Santuak dio: “Nire etxea otoitz-etxe izango da”. Zuek, ordea, “lapur-zulo” bihurtu duzue». Egunero tenpluan irakasten ari ohi zen. Apaizburuak, legemaisuak eta herriko handikiak Jesus hil nahian zebiltzan; baina ez zuten asmatzen zer egin, herri guztia aho zabalik baitzegoen hari entzuten.
Lukas 19, 45-48.
Parrokia eta elizei zail egiten zaie “otoitz etxe” izatea: leku handiak, jendea ezin bildu multzo txiki eta isilean… Horren ordez, zenbait parrokia ahalegintzen dira otoitzerako leku aproposak egokitzen. Eskergarri da han eta hemen Espiritualitate Etxeek eskaintzen duten aukera.
Eliza gehienek duten artelanen bikaintasuna hain aurrez aurrekoa da, ezen askotan ez da suertatzen mugaz-harako esperientziarako bitartekaririk. Arteak berean uzten gaitu, harago eraman barik. Nahi gabe, noski. Baina baita ere ez delako pedagogia bat sustatzen, artearen ildotik beste zentzu batera abiatzeko.
Horrez gain, orain gutxi arte elizak gehiago izan dira “prediku-sermoi etxe”. Liturgian bertan dotrina eta azalpenak lehenetsi egin izan dira, otoitz eta espiritualtasun giroa bideratzea baino. Oso sarritan Hitzari eta hitzaldiei eman zaie lehentasuna fede-biderako. Hitzaldiek fedea argitu eta sendotzea bilatu izan dute; ez hainbeste fedearen sentipena barnenetik askatzea.
Badator beste aldi bat “otoitz etxearen” kaltetan: elizak bisita turistiko leku gisa. Bertoko artea “arte soil” gisa hartuz…
* Ebanjelioaren testuak Loyola Komunikazio Taldearen baimenarekin.
0 Comments