HITZA

Bizitza Ebanjelioaren argitan: egunero tartea hartzeko gonbidapena

 

Azaroak 15

Aldi hartan, Jesus Jerusalemera bidean, Samarian eta Galilean barna zihoan. Herrixka batean sartzean, hamar legenardun atera zitzaizkion bidera. Urruti gelditurik, deiadarka esan zioten: «Jesus, Maisu, erruki zakizkigu!». Jesusek, ikustean, esan zien: «Joan eta azaldu apaizengana». Bidean zihoazela, garbi gelditu ziren. Haietako bat, sendatua zegoela oharturik, Jainkoa deiadarka goratuz itzuli eta Jesusen oinetara ahuspez erori zen, eskerrak emanez. Samariarra zen bera. Jesusek esan zuen: «Ez al dira hamarrak garbi gelditu? Non dira beste bederatziak? Ez al da izan atzerritar hau besterik Jainkoa goratzera etortzeko?». Gero, esan zion: «Jaiki eta zoaz; zeure sinesmenak salbatu zaitu».

Lukas 17, 11-19.

Legenardunak ezin ziren gainerako pertsonekin bizi. Gizartetik bazterturik zeuden eta debekatuta zeukaten gainerakoengana hurbiltzea. Arau hori, gainera, ez zen osasun arau hutsa, herriko besteak ez kutsatzeko jarria, alegia; erlijio araua zen: legena zeukaten… bekatariak zirelako. Jesusek gaixotasuna kendu zienean ere, ez zien osasun mesedea bakarrik egin. Gizarte barrura sartu zituen berriro eta galdua zuten izen ona itzuli zien.

Haietako bat, berriz, beste guztiak baino baztertuago zegoen: atzerritarra zen, samariarra, juduek mespretxatzen zuten herrikoa, hain zuzen ere. Eta huraxe itzuli zen, Jainkoa goratuz, Jesusengana, eskerrak ematera. Jainkoak baztertuenengandik eta baztertuenengan deitzen digu oihuka. Eta fedea haiengan eta haien alde erantzutean datza. Gure konfiantza gizarteak baztertu, zigortu eta abandonatzen dituen horien etorkizunean jartzen badugu, agian guk ere Jesusen hitzak entzungo ditugu: “zeure sinesmenak salbatu zaitu”.

Bittor Uraga

* Ebanjelioaren testuak Loyola Komunikazio Taldearen baimenarekin.

Oihartzunak (1 oihartzun daude)
L

1 Comment

  1. Bihotza esperantzaz betetzeko bultzada polita, gaurko iruzkina. Mila esker!

Submit a Comment

Zure e-posta helbidea ez da argitaratuko. Beharrezko eremuak * markatuta daude

Privacy Overview

This website uses cookies so that we can provide you with the best user experience possible. Cookie information is stored in your browser and performs functions such as recognising you when you return to our website and helping our team to understand which sections of the website you find most interesting and useful.