Ereilearen eta haziaren parabolari arreta jartzeko esaten die Maisuak: “Entzun…”. Agindu nabarmena izanik ere, esanahi berezia du. Parabolaren zeharkako mezua hau da: aukerak izan edo galdu ditzakegu guregan gertatzen denari balioa ematen diogun neurrian.

Haziaren eraginkortasuna non geratu den kontuan hartuta, halakoa izango da: lurrean, sasi artean, utzia ala lur barnean sartua. Antzera gertatzen da Ebanjelioari ematen zaion harrerarekin, hau da, guretzat nola hartzen dugun: ispilu gisa ala beste testu bat bezala hartzen dugun. Ebanjelioa bihotz-barnean eta ez ideien zurrunbiloan kokatzeko da. Sakonera eramanez gero berriztagarri suerta daiteke; bestela, informazio soila izango da.

Ez dugu beti berdin hartzen Ebanjelioaren mezua. Bertako esanak dastatu eta barneratzeko dira, ez soilik irakurri eta ulertzeko. Dei edo oihartzun bezala hartzean eragingo digute. Noski, ez bat-batean, apurka-apurka baizik.

Berdintsu gertatzen da bizitzan datorkigun gauza bakoitzari nolako harrera ematen diogun: azalekoa, ala esanahia aurkitu nahi dugun. Gauzaz gauza nola gabiltzan: ikuspegi orokorretik ulertzeko bidea eginez, ala ez. Den guztiari balioa emateak Espiritualitatean sartuko gaitu.

Patxi Otamendi