Legea ez ezagutzeak legea betetzetik salbuesten ez duela entzuteak, nolabaiteko harridura sortzen digu; izan ere, arau bat ezagutzen ez bada, ezin da aplikatu, eta, beraz, ez du balio bere xedea betetzeko. Gaur ere ezagutzen ez ditugun edo partekatzen ez ditugun arauen menpean gaude. Arau hauetako batzuk legeak dira, beste batzuk berriz, gure eguneroko erabakiak hartzeko ditugun irizpideak eta ohiturak. Guzti hauek arrazoi desberdinengatik onartzen ditugu,  nahiz eta batzuetan besteen oinazea duten berekin.

Ebanjelioan, Jesusek legearen hitzei legearen zergatiaren eta zentzuaren gainetik lehentasuna ematen ziotenen jarrera salatzen du. Jesusentzat erreinura sartzeko giltza ez da legea betetzea, legearen atzean dagoen Jainkoaren borondatea jasotzea baizik.

Jainkoaren legeak senideengandik hurbilago egotera garamatza beti. Legeak nire errukia txikiagotzen badu, Jainkoarengandik urruntzen ari naiz. Jesusek gure arreta Jainkoaren borondatearen harreran jartzera gonbidatzen gaitu, bere seme-alaba guztientzako errukia eta justizia den borondatea. Borondate hori onartzeak gure bizitzak arautzen dituzten hainbat arau eta irizpideengandik askatzen gaitu.

Jon Arruti