Jesusek proposatzen digun bizitza-bidean neurrigabekeria eta zentzugabekeria asko dago giza irizpideetatik. Horrela, gaurko ebanjelioan, erasoen eta bidegabekerien aurrean oposizioari uko egitea eskatzen duen moraltasuna aurkitzen dugu; etsaiei maitasuna eskatzera ere iristen den moral baten aurrean gaude. Ez dirudi proposamen oso zentzuzkoa denik, eta ez dira falta izan halako proposamen etikoa guztiz irrealtzat, justiziaren aurkakotzat eta ordena sozialerako arriskutsutzat jo izan dutenak. Inguratzen gaituen gizartean gainera, ohikoa bihurtu da kontrako norabidean doazen proposamenak eta jarraibideak entzutea. 

Hala ere, ongi azterturik, kristau-bidea da mundua eralda dezakeen jarrera erradikalera jotzen duen bide bakarra, izan ere, historiaren indarkeriazko ekintza-erreakzio zirkuluak apurtzeko gai den Jainkoarena den bihotz onbera batetik soilik eralda daiteke mundua. Indarkeriarik eza eta etsaiak maitatzea proposatzeak ez dakar munduko injustizia eta indarkeria onartzea, ezta biktimei horrela egiten irakastea ere, baizik eta mundua benetan eralda dezaketen oinarrizko jarrerak askatasunez aukeratzea eta lantzea, eta haiek ekar liezazkiguketen ondorioak hartzeko prest izatea. Jesusek asko espero du bere jarratzaileengandik, eta horregatik kristau-morala gehiengoaren  morala da, bikaintasunerako bokazio-deia dena. Kristauak dei horretatik bizi du justiziaren alde eta indarkeriaren aurka borrokatzeko konpromisoa. Eta horrela egiten da, jarrera horietatik bakarrik hautsi daitezkeelako historian eta giza bizitzan nagusi diren injustiziaren eta indarkeriaren zirkuluak.

Kristoren aurrean, hausnartu gaurko ebanjelioaren hitzak eta zugan sortzen dituzten zirrarak.

Jon Ona