HITZA
Bizitza Ebanjelioaren argitan: egunero tartea hartzeko gonbidapena
Abenduak 4
Egun haietan, Joan Bataiatzailea Judeako basamortuan agertu zen, hots eginez: «Bihotz berri zaitezte, hurbil da-eta zeruetako erreinua!» Honengatik esana zuen Isaiasek: «Mintzo bat oihuka ari da basamortuan: Urra ezazue bidea Jaunarentzat, zuzendu haren bidexkak!» Joanek gamelu-larruzkoa zuen jantzia, eta gerrian, larruzko gerrikoa, eta matxinsaltoak eta basa-eztia zituen janari. Jerusalemetik, Judea osotik eta Jordan aldetik harengana joaten zen jende guztia; haiek aitortzen zituzten beren bekatuak, eta hark bataiatu egiten zituen Jordan ibaian. Baina Joanek, fariseu eta saduzear asko bere bataioa hartzera zetozkiola ikusirik, hau esan zien: «Sugekumeok! Nork irakatsi dizue, gainean duzuen haserreari ihes egiten? Eman itzazue bihotz-berritzeari dagozkion fruituak! Eta ez esan zeuen baitan: “Guk Abraham dugu aita”. Hara zer esaten dizuedan: Jainkoak harri horietatik ere sor diezazkioke seme-alabak Abrahami. Ezarri diote aizkora zuhaitz hondoari;fruitu onik ematen ez duen zuhaitza, hondotik ebaki eta sutara botako dute. Nik urez bataiatzen zaituztet, bihotz-berri zaitezten; nire ondoren datorrena, ordea, ni baino ahaltsuago da, ni ez bainaiz inor harenoinetakoak eramateko ere; hark Espiritu Santuaz eta suaz bataiatuko zaituzte. Eskuan dauka sardea; larraina garbituko du eta garia mandiora bilduko; lastoa, berriz, itzali ezin den suan erreko du».
Mateo 3, 1-12.
“Bihotz berri zaitezte, hurbil da-eta zeruetako erreinua”. Bihotz berritzea ez da teorian egin daitekeen ezer, eguneroko bizitzan gauzatzen den esperientzia baizik. Jainkoak berak posible egiten duen esperientzia; Berak deitu egiten gaitu eta gure erantzunaren zain dago.
Badu, bai, bere zergatia, zeruetako erruinua… zerukoa eta lurrekoa; gure itxaropena ez da zerura begiratze horretan amaitzen. Jainkoari begiratu bai, lurrean gure eskuak zabaldu eta bere erreinua martxan jartzeko.
Guzti hori, fruituak emateko, “bihotz-berritzeari dagozkion fruituak”. Maitasunak, errukiak ematen duen fruitua da hau; gure barruan hasten dena, eta gure nahia eta kapritxoak aldenduz, nia alde batera utziz, gure begiradaren aurrean bestea jartzen duena. Bestea Jaunaren aukeratua da; ez du famarik, ez dirurik; gizakiak baztertu duena da, behartsua da, beharra materiala izan daiteke, gaixorik edo bakarrik egon daiteke, gazte edo adinekoa.
Bihotz-berritzeak itxaropenari ere deitzen dio, Joan Bataiatzailea baina handiagoa da datorrena; ez gaitzala besoak gurutzatuta harrapatu; izan gaitezen gu ere besteentzat itxaropen, besteentzat erreinu.
* Ebanjelioaren testuak Loyola Komunikazio Taldearen baimenarekin.
0 Comments