Garaiko gizartearen isla ere badena jakin arren, kosta egiten zait batzuetan zenbait testutan naturalki onartutzat ematen bide diren giza-arteko batzuk irakurtzea, gogoan dudan Nazareteko bizi-proiektuarekin alderaturik, nolabaiteko barne-ezinegona sentitu gabe; desitxuraturik al dut agian JesuKristoren bizi-proiektu hori? Nire-neure gogartera nahieran eginda beharbada?

Gaurko honen hasierakoan halaxe gertatzen zait:

• Gizakien arteko harremanei gagozkielarik, ondo bat al dator “nagusi-morroi” hirerakia-harreman zakar-latza Nazaretarrak aurreko egunetako testuetan ere aldarrikatzen digun Jainkoaren Erregetzarekin?
• Eta Etxe”jauna”-ri, gaur egunean mendebaldean behintzat nahikoa zabaldurik dagoen kultura-molde batetik usaindurik, ez ote dario patriarkalkeria kutsu aski zaharkiturik?

Ez al dakit harago/honago begiratzen eta ikusten? Oso litkeena… Arazorik gabe ulertu eta onartzen dut Bera dela Irakaslea, Nagusia eta EtxeJauna, jakina, areago judu Herriko agintariekiko polemika giroan kristau-komunitatean bere “goren” hori nabarmendu nahi izatea; geu lako gizaki bete bai, baina geu bestelako Jainko ere bada, haraindikoa; arazoa dator irakurketa horretatik, giza-tentazioari ezin eutsirik, Hari ez, baizik eta nork bere buruTXOari ezarri nahi diogunean gainerako pertsonekiko nagusikeria, irakaslekeria, JaunTXOkeria. Halakoetan ez neukake ez zalantzarik: hori bai “gau iluna”, “bizitza hondatzea” eta “hil”tzea, “beldur” iturri bezainbeste, “infernua” pertsona oso(ar)entzat…

Txoririk txikiena izanik ere, denok ordea Aita/Amaren begietan neurrigabeko duintasun eta balio bereko, seme-alaba oso.

Aitor dut.

Juankar Olaeta