“Nor izan” giza seme-alaben erronka nagusia. Jesus horretan ikusten dugu, eta aldi estu batean, bere oinarrizko jarrerak agertzeko Jerusalem hiriburu nagusira joatea erabakitzen du. Eta bere taldekideak zalantza berean, hara eta hona dabiltza: Jesus bizitza eredua onartzeko bidean, eta batera ibilbide horrek eskatzen dituen aukerak eta erabakiak hartu beharrean.

Joxean Artze zenaren hitzak gogora ekarten ditugu: “Garenak izatea, bizitza guztiko borroka latza dugu gizasemeok…”. Hauxe ikusten dugu Lukasen pasarte honetan: Jesusen izate eta egiteak ez ditu pertsonak leku berean uzten, Hura egitasmoa aurrera bultzatzeko erabakia hartzera zihoan. Jainko aita-amaren asmoak ekinean jartzen ditu.

Nor-bera izateko, Ebanjelioak dio gizakiok aukerak egin beharrean aurkitzen garela. Jesusek bizitza ibilbidean horrela jokatzen du: txikienak lehenak jartzen ditu, Jainkoaren asmoak lehen mailan ipintzen ditu, giza harremanetan batzuk jartzen ditu mahai inguruan, bihotz onekoak gogoan hartzen ditu… Eguneroko bizitza honela ehuntzen dugu: aukera txikiei aurre emanez, eta horrela Jainko asmoei gure bitartez historian zirrikitu bat zabalduz. Eta holaxe goaz ni-neu izaten, gu-geu harremanen bitartez.

Ebanjelioan bigarren gonbidapen bat agertzen zaigu: bihotzeko tolesturarik gabe bizi izatera. Jesusen ausardiak eta egitasmoak liluratuta bizi ginen lehenengo aldietan, baina urteak aurrera joan ahala, berriro gaurkotzea jarraitzaile izatea erronka bihurtzen da. Posible da berriro Nikodemoren antzera barrena sendotzea, asmo berriei tokia egiteko?

Gure Jainko zaletasunak  zintzotasuna behar du, bakoitzaren konfiantza berriro gaurkotzea, nor izatearen zirrara entzuteko prest bagaude.

Ana Berrizbeitia