Gaurko kalendarioa, Gregorianoa dugu. Julio Cesarrek K.a.-ko 46an osatutako egutegia, 1582an Gregorio XIII. Aita Santuak eratu eta kristautu egin zuen. Urteroko egutegia hartuz, martiaren ekinokziotik hurrengo ilbetea ikusi eta hurrengo domeka beti izango da Bazko Eguna. Atzerantz joaz, aste bete lehenago Erramu Eguna da eta berrogei egun lehenago, eguaztenez, hausterreguna eta, jakina, bezpera, aratuste martitzena dugu. Horrexegaitik ospatzen dira jaiok garizuman sartu aurreko egunotan, Elizaren aspaldiko agindua betetzeko eta urte bakoitzean egun ezbardinetan, ilargiaren arabera. Hausterregunean garizuma hasten da. Aste Santura hurbildu ahala, gure herrietan ejerzizio edo gogojardunak egiteko ohitura euki dugu Pazkoazkoaz betetzeko. Aste Santuko elizkizunak garrantzitsuak izan dira eta ia herri osoa hurreratzen izan da elizara debozioz beterik. Baina azken urteotan, Aste Santuaren kristau zentzua aldatzen joan zaigu eta jende askok elizara barik beste ekintza batzuetara jo du, besteak beste, oporretara. Herri askotako elizak erdi hutsik ikusten dira Aste Santuan ere, eta gainera, gaur egun elizgizonak eurak ere eskastu egin zaizkigu. Joan den mendearen erdi alderantz, euskal misiolari ugari joan zen mundutik zehar, gaur, ordea, geu gaude misiolari beharrizanean. Zer egin? Laikook ere Ebanjelioa bizi eta zabaldu nahinondik. Hala biz!
