HITZA
Bizitza Ebanjelioaren argitan: egunero tartea hartzeko gonbidapena
Otsailak 26
Aldi hartan, haurrak eraman zizkioten Jesusi, uki zitzan; ikasleek, ordea, haserre egiten zieten. Hori ikustean, haserretu zen Jesus eta esan zien: «Utzi haurrei nigana etortzen, ez galarazi, horrelakoena da-eta Jainkoaren erreinua. Benetan diotsuet: Jainkoaren erreinua haur batek bezala hartzen ez duena ez da inola ere bertan sartuko» Eta, besarkatuz, bedeinkatu egiten zituen haurrak, eskuak gainean ezarriz.
Markos 10, 13-16.
Jakingo balu Jesusek horren beste diru eta denbora erabili ditugula haurtzaroa iraganean uzteko eta heldutasunera iristeko…Jakingo balu gure mundu honetan garaipenik preziatuena umetzen gintuen erlijiotik lortutako haustura dela…Jakingo balu erlijioa horren beste mendeetan fededunak umetzen saiatu dela…Beragandik jasotzen dugun gonbidapena beste era batekoa da, noski. Umeek ez dute iraganik, ez dituzte hausturetan garaipenak neurtzen ezta euren bizitza bizitzeko beste pertsonak umetu beharrik. Konfiantzaz bizitzera eta berdintasunezko harremanetan finkatutako bizi proiektua eraikitzera da Jesusen hitz eta besarkada honen bitartez jasotzen dugun gonbidapena.
* Ebanjelioaren testuak Loyola Komunikazio Taldearen baimenarekin.