HITZA
Bizitza Ebanjelioaren argitan: egunero tartea hartzeko gonbidapena
Otsailak 20
Aldi hartan, Jesusek esan zien ikasleei: «Hau diotsuet zuei, entzuleoi: Maita itzazue zeuen etsaiak, egin on gorroto dizuetenei, bedeinkatu madarikatzen zaituztetenak, egin otoitz izen ona kentzen dizuetenen alde. Masail batean jotzen zaituenari eskaini bestea ere; soingainekoa kentzen dizunari ez ukatu jantzia ere. Eskatzen dizun edonori eman, eta zeurea kentzen dizunari ez itzularazi. Eta besteek zuei egitea nahi duzuena, egin zuek ere besteei.
Maite zaituztetenak bakarrik maite badituzue, zer esker on zor zaizue? Bekatariek ere maite dituzte beren maitaleak. Eta on egiten dizuetenei bakarrik egiten badiezue on, zer esker on zor zaizue? Bekatariek ere egiten dute beste horrenbeste. Eta ordaina hartzekotan bakarrik ematen baduzue maileguz, zer esker on zor zaizue? Bekatariek ere aurreratu ohi diote elkarri, dagokiena hartzekotan.
Ez! Zuek maitatu etsaiak, egin on eta eman maileguz, ordainari begiratu gabe; handia izango da zuen saria, eta Goi-goikoaren seme-alaba izango zarete, ona baita hura esker txarrekoentzat eta gaiztoentzat. Izan zaitezte errukiorrak, zuen Aita errukiorra den bezala. Ez gaitzetsi inor, eta Jainkoak ere ez zaituzte gaitzetsiko; ez kondenatu, eta ez zaituzte kondenatuko; barkatu, eta barkatuko dizue; eman, eta emango dizue: neurri betea, sakatua, estutua eta leporainokoa emango dizue altzora. Izan ere, zuek zein neurriz neurtu, halakoaz neurtuko zaituzte Jainkoak»
Lukas 6, 27-38.
Umberto Ecoren “Arrosaren izena” (El nombre de la rosa) liburuan esaldi hau aurkitzen dugu: “Adso, profetengandik eta egiaren alde hiltzeko prest daudenengandik ihes egin, beste askoren heriotza ere eragiten dutelako, askotan norberarena baino lehenago”.
Jesusek erradikaltasunerako deia egiten digu, Maitasunaren Jainkoarengan sustraituta bizitzera, Hura bezala, errukiorrak izan ahal gaitezen.
Erradikaltasun ebanjelikoa ez da inoiz kristau fanatismoarekin nahastu behar; izan ere, zenbat eta erradikalagoak izan orduan eta fanatiko gutxituagoak izango gara, eta alderantziz.
Izan ere, erradikal izateak zera esan nahi du, gure ideia, sentimendu eta ekintzei ez ezik, Jesusen ideia, sentimendu eta obrei ere lotuta bizitzea. Erradikaltasunaren fruitua etsaienganako maitasuna da, eta fanatismoarena, berriz, lagunenganako gorrotoa.
* Ebanjelioaren testuak Loyola Komunikazio Taldearen baimenarekin.
