HITZA
Bizitza Ebanjelioaren argitan: egunero tartea hartzeko gonbidapena
Abenduak 7
Aldi hartan, Jesusek esan zien ikasleei: «Zer deritzozue? Gizon batek ehun ardi baldin baditu eta bat galtzen bazaio, ez al da laurogeita hemeretziak mendian utzi eta galdutakoaren bila joango? Eta aurkitzen badu, benetan diotsuet, poz handiagoa izango du bakar harengatik, galdu ez diren laurogeita hemeretziengatik baino.
Era berean, zeruko zuen Aitak ez du nahi txiki hauetako bat ere galtzerik».
Mateo 18, 12-14.
Zenbat aldiz ikusten ditugun gure inguruko gertaera gaizki daudenak eta, ezer egin gabe, beste aldera begiratzen dugun. Batzuetan, gogorik ez dugulako, beste batzuetan, konpromisorik hartu nahi ez dugulako eta, gehienetan, arretarik jarri gabe, ezer gertatuko ez balitz bezala aurrera jarraitzen dugulako. Kasu askotan, inpotentzia sentimendu batek inguratzen gaitu, eta zerbait egiten badugu ere, ez duela ezertarako balioko pentsatzen dugu, munduak berdin jarraituko duela pentsatuz.
Gaurkoan, Jaunak txikiari ematen dion garrantzia agertu nahi digu Jesusek, eredu eder horren bidez: batek bakarrik berez balio ñimiñoa duela dirudien arren, ipintzen dion maitasunari esker, goi mailara igotzen du. Ze desberdintasuna gaur egungo gizartearen jokaerekin.
Era berean, gu ere ahalegindu beharko ginateke. Normalean, eguneroko bizitza afera txikiez betetzen da, baina horien artean batzuk arreta berezia behar izaten dute, laguntza oihuka eskatzen ez badira ari ere. Ze ederra horrelakoak bihotz zabalez eta erantzukizunez hartuko bagenitu. Gure inguruak hobera egingo luke, zalantzarik gabe.
* Ebanjelioaren testuak Loyola Komunikazio Taldearen baimenarekin.