HITZA
Bizitza Ebanjelioaren argitan: egunero tartea hartzeko gonbidapena
Azaroak 18
Aldi hartan, Jesus, Jerusalemera hurbildu eta hiria ikustean, negarrez hasi zen berarengatik, eta esan zuen: «Ai Jerusalem, ulertuko bazenu zuk ere gaur bakerako bidea! Baina ez zara gauza hori ikusteko. Etorriko zaizu, bai, zeure etsaiek lubakiz inguratu, setiatu eta alde guztietatik erasoko dizuten garaia; txikitu egingo zaituztete zu eta zure bizilagunak; eta ez dizute harririk harri gainean utziko, Jainkoak eskaini dizun salbamen-aukera aintzat hartu ez duzulako».
§ Lukas 19, 41-44.
Jesus Jerusalemen sartu zen asto baten gainean eta bere jarraitzaileek “mesias” eta “errege” esaten zioten oihuka. Hango jende serioak, ordea, ez zuen hura ontzat hartu; areago, jarraitzaileak isilarazteko agintzen zioten Jesusi. Normala, bestalde, ondo pentsatuz gero: ez da erraza izan behar zure esperantza guztia, zure konfiantza osoa, halako behartsu lander bati ematea. Eta Jesusek orduan negar egin zuen haiengatik, Jainkoak eskaintzen zien salbamen-aukerari bizkarra emanez, pekatuzko sistema hiltzailearen mendean gelditzea hautatzen baitzuten. Eta gaur ere egoera berdina da. Jainkoak eskaintzen digun salbamen-aukera Jesusek bere ordezkotzat utzi zizkigunak dira: pobreak, ospegabeak, bigarren edo hirugarren mailakoak, jende serioaren konfiantza merezi ez dutenak… Negar egin beharko du Jesusek gugatik ere?
* Ebanjelioaren testuak Loyola Komunikazio Taldearen baimenarekin.